واشنگٹن: (رائیٹ ناؤ نیوز) امریکی صدر ڈونلڈ ٹرمپ نے کینیڈا کو جنگلاتی آگ سے امریکہ میں آلودگی پھیلنے پر ٹیرف بڑھانے کی دھمکی دی ہے۔ انہوں نے کہا ہے کہ یہ اقدام امریکہ کو پہنچنے والے نقصان کی بھرپائی کے لیے ضروری ہے۔

میڈیا رپورٹس کے مطابق، ٹرمپ نے کہا ہے کہ کینیڈا پر محصولات میں اضافہ کیا جائے گا تاکہ جنگلاتی آگ سے پیدا ہونے والی آلودگی کے اثرات کو کم کیا جا سکے۔ اس دھویں نے امریکہ کے بڑے حصوں کو متاثر کیا ہے۔

کینیڈا اور شمالی مینیسوٹا میں جنگلاتی آگ سے دھویں کے بادل چھا گئے ہیں جس کی وجہ سے پورے امریکہ میں غیر صحت بخش ہوا کے معیار کے انتباہات جاری کیے گئے ہیں۔

واضح رہے کہ کینیڈا کے وائلڈ لینڈ فائر انفارمیشن سسٹم کے مطابق، وہاں 937 فعال آگ جل رہی ہیں، جن میں سے زیادہ تر قابو سے باہر ہیں۔ ٹرمپ نے کہا کہ یہ غفلت کا نتیجہ ہے اور امریکہ کو اربوں ڈالر کا نقصان پہنچ رہا ہے۔

یاد رہے کہ ٹرمپ نے کینیڈا پر الزام لگایا ہے کہ وہ اپنے جنگلات کی دیکھ بھال میں ناکام رہا ہے۔ انہوں نے کہا کہ اس آلودگی کی قیمت کینیڈا کو ٹیرف کی صورت میں ادا کرنی ہوگی۔