اسلام آباد: (رائیٹ ناؤ نیوز) چار پاکستانی بائیکرز نے پاکستان رجسٹرڈ موٹرسائیکلوں پر آرکٹک سرکل پہنچ کر تاریخ رقم کر دی۔ یہ پاکستانی بائیکرز ایسا کرنے والے پہلے گروپ بن گئے ہیں۔

اس مہم کی قیادت معروف ایڈونچر ٹریولر شیراز سمیع نے کی۔ ان کے ساتھ ان کے 19 سالہ بیٹے اور دو دیگر ساتھیوں نے مل کر ہزاروں کلومیٹر کا سفر طے کیا۔ یہ ٹیم کئی ممالک سے گزرتے ہوئے ناروے کے نورڈ کیپ (نارتھ کیپ) پہنچی۔

شیراز سمیع نے سوشل میڈیا پر اپنی کامیابی کا اعلان کرتے ہوئے بتایا کہ انہوں نے سفر کے دوران ریگستانوں، بلند پہاڑوں اور بین الاقوامی سرحدوں کو عبور کیا۔ انہوں نے کہا کہ یہ سفر ہمت اور عزم کی علامت ہے۔

اس تاریخی سفر کو نہ صرف منزل تک پہنچنے کا عمل قرار دیا گیا بلکہ یہ بھی ثابت کیا کہ ہمت و عزم انسان کو توقعات سے آگے لے جاتا ہے۔ شیراز سمیع نے کہا کہ ہر کلومیٹر نے یقین کو مضبوط کیا کہ ناممکن اکثر صرف ایک لفظ ہوتا ہے۔

واضح رہے کہ شیراز سمیع نے اس کامیابی کو پاکستان کے لیے باعثِ فخر قرار دیا ہے، انہوں نے کہا کہ ان کی ٹیم نے پاکستان کا پرچم دنیا کے شمالی ترین مقام تک پہنچایا۔