کیلیفورنیا (رائیٹ ناوٴ نیوز) یوٹیوب نے کم عمر صارفین کے لیے پلیٹ فارم کو محفوظ اور تعمیری بنانے کے لیے والدین کے کنٹرولز میں توسیع کر دی ہے۔ گوگل کی ملکیت ویڈیو شیئرنگ پلیٹ فارم نے والدین کو یہ اختیار دیا ہے کہ وہ یہ طے کر سکیں کہ ان کے نوعمر بچے یوٹیوب شارٹس پر کتنا وقت گزار سکتے ہیں، جس کے لیے 15 منٹ، 30 منٹ، 45 منٹ، ایک گھنٹہ اور 2 گھنٹے کے آپشنز فراہم کیے گئے ہیں۔

والدین کو شارٹس فیڈ کو مکمل طور پر بند کرنے کا بھی اختیار دیا گیا ہے، جس سے ایک دن کے لیے شارٹس دیکھنے کی سہولت روکنے کی سہولت ملے گی۔ نئے فیچرز میں عمر کے لحاظ سے موزوں اور تعلیمی مواد کو فروغ دینے کے رہنما اصول بھی شامل ہیں، اور نوعمر صارفین کو خان اکیڈمی کڈز، کریش کورس کڈز اور ٹیڈ ایڈ جیسے تعلیمی چینلز کی ویڈیوز تجویز کی جائیں گی۔

یوٹیوب نے یہ اقدامات یوتھ ایڈوائزری بورڈ، یو سی ایل اے کے سینٹر فار اسکالرز اینڈ اسٹوری ٹیلرز، امریکن سائیکالوجیکل ایسوسی ایشن اور بوسٹن چلڈرنز اسپتال کی مشاورت سے تیار کیے ہیں۔ اس کے علاوہ، والدین کو بچوں کے اکاؤنٹس بنانے کی سہولت بھی دی گئی ہے، جو خودکار طور پر محفوظ سیٹنگز کے ساتھ ہوں گے، اور موبائل ایپ میں چند کلکس کے ذریعے اکاؤنٹس تبدیل کرنے کی سہولت بھی دستیاب ہوگی۔

یوٹیوب کا کہنا ہے کہ ان نئے فیچرز کا مقصد والدین کو زیادہ کنٹرول دینا اور نوعمر صارفین کے لیے ایک محفوظ اور تعمیری ڈیجیٹل ماحول فراہم کرنا ہے۔