اسلام آباد: (رائیٹ ناؤ نیوز) حکومت نے پیٹرولیم مصنوعات کی قیمتوں کا روزانہ تعین کرنے کا فیصلہ کیا ہے۔ اس فیصلے کے عوام، ٹرانسپورٹ، کاروبار اور معیشت پر براہ راست اثرات مرتب ہوں گے۔

محکمہ خزانہ کے مطابق روزانہ کی بنیاد پر قیمتوں کا تعین کرنے سے شہریوں کو اپنے روزمرہ اخراجات کی منصوبہ بندی میں مشکلات پیش آسکتی ہیں۔ ملازمت پیشہ افراد، ٹیکسی ڈرائیورز اور کاروباری طبقے کو بار بار بجٹ میں تبدیلی کرنا پڑے گی۔

ٹرانسپورٹرز نے فوری طور پر کرایوں میں اضافے کا مطالبہ کیا ہے، جبکہ قیمتوں میں کمی کا فائدہ عموماً فوری نہیں ملتا۔ اس طرح مسافروں کے سفری اخراجات میں اضافہ اور کرایوں کے تعین پر تنازعات جنم لے سکتے ہیں۔

واضح رہے کہ پاکستان میں ترسیل کی زیادہ تر خدمات سڑکوں کے ذریعے ہوتی ہیں، جس کی وجہ سے پیٹرولیم قیمتوں میں روزانہ اتار چڑھاؤ ضروری اشیاء کی قیمتوں پر اثر ڈال سکتا ہے۔ تاجروں کے لیے صحیح لاگت کا اندازہ لگانا مشکل ہوگا۔

یاد رہے کہ عالمی منڈی میں خام تیل کی قیمتوں کے اتار چڑھاؤ کے باعث روزانہ قیمتوں کا نظام فوری ریلیف فراہم کر سکتا ہے، تاہم اس کے لیے مؤثر نگرانی اور شفافیت کی ضرورت ہوگی۔