کوٹلی: (رائیٹ ناؤ نیوز) چیئرمین بلاول بھٹو زرداری نے کوٹلی میں جلسہ عام سے خطاب کرتے ہوئے آزادکشمیر میں پیپلزپارٹی کی حکومت بنانے کا اعلان کیا ہے۔ بلاول بھٹو نے کہا کہ کوٹلی کے عوام اور پیپلزپارٹی کا رشتہ خاندانی نوعیت کا ہے۔

انہوں نے مزید کہا کہ پیپلزپارٹی کے انتخابی نمائندے خاندان کے افراد کی طرح ہیں۔ ہم ایک دوسرے کے دکھ سکھ میں ساتھ رہتے ہیں۔ بلاول بھٹو نے بینظیر بھٹو کی جلاوطنی کے دنوں کو یاد کرتے ہوئے کہا کہ مشکل دور میں پارٹی کارکنوں نے ساتھ نہیں چھوڑا۔

بلاول بھٹو زرداری نے چودھری یاسین کی وفاداری کو سراہا اور کہا کہ مشکل وقت میں وفاداری کی مثال قائم کی۔ انہوں نے کہا کہ کوٹلی کے عوام نے وفاداری اور بہادری کی مثال قائم کی ہے۔ آزادکشمیر کے انتخابات میں عوام کو سوچ سمجھ کر فیصلہ کرنا ہوگا۔

بلاول بھٹو زرداری نے کہا کہ ان شاء اللہ آئندہ انتخابات میں پیپلزپارٹی کی حکومت بنے گی۔ انہوں نے کارکنوں سے کہا کہ الیکشن میں کامیابی دلوانا ان کی ذمہ داری ہے اور بہتر نتائج کی توقع رکھتے ہیں۔

یاد رہے کہ پیپلزپارٹی گزشتہ چھ ماہ سے آزادکشمیر میں حکومت کا حصہ رہی ہے۔ بلاول بھٹو نے کہا کہ پیپلزپارٹی اور کشمیری عوام کا تین نسلوں پر محیط رشتہ ہے اور مسئلہ کشمیر کا مقدمہ بھرپور انداز میں لڑتے رہیں گے۔