کراچی: (رائیٹ ناؤنیوز) کراچی گڈز کیریئرز ایسوسی ایشن نے پیٹرولیم مصنوعات کی قیمتوں میں اضافے کے خلاف ملک گیر احتجاج کا اعلان کیا ہے۔ ایسوسی ایشن نے حکومت کو 24 گھنٹے میں فیصلہ واپس لینے کی مہلت دی ہے، بصورت دیگر ٹرانسپورٹ کا پہیہ جام کر دیا جائے گا۔

ایسوسی ایشن کے جنرل سیکریٹری ندیم اختر آرائیں نے کہا کہ حالیہ اضافے سے ٹرانسپورٹرز مالی بحران کا شکار ہیں۔ انہوں نے کہا کہ عالمی منڈی میں تیل کی قیمتوں میں کمی کے باوجود پاکستان میں فائدہ نہیں دیا جاتا۔

ندیم اختر نے کہا کہ حکومت کی پالیسیوں سے نہ صرف ٹرانسپورٹ انڈسٹری بلکہ مجموعی معیشت بھی متاثر ہو رہی ہے۔ انہوں نے الزام لگایا کہ ڈرائیورز کو غیر ضروری چیکنگ اور رشوت ستانی جیسے مسائل کا سامنا ہے۔

ایسوسی ایشن نے انتباہ کیا کہ اگر حکومت نے فوری توجہ نہ دی تو خوراک، ادویات اور دیگر ضروری اشیاء کی ترسیل متاثر ہوگی۔ یہ معیشت اور عوام دونوں کے لیے ناقابل تلافی نقصان ہوگا۔

واضح رہے کہ ایسوسی ایشن کی قیادت ملک کی بڑی ٹرانسپورٹ تنظیموں سے روابط میں ہے اور جلد احتجاجی تحریک کا شیڈول جاری کیا جائے گا۔ انہوں نے وزیراعظم سے مطالبہ کیا کہ پیٹرولیم قیمتوں پر نظرثانی کی جائے۔