اسلام آباد: (رائیٹ ناؤ نیوز) وکلا ایکشن کمیٹی نے عدالتی چھٹیوں کے بعد علی احمد کرد کی قیادت میں وکلا تحریک چلانے کا اعلان کر دیا ہے۔ حامد خان ایڈووکیٹ نے پریس کانفرنس میں بتایا کہ تحریک کا باقاعدہ آغاز عدالتی تعطیلات کے بعد کیا جائے گا۔

وکلا نے پریس کانفرنس میں قرارداد کا متن پڑھ کر سنایا، جس میں ہائیکورٹ ججز کی تعیناتی کے موجودہ طریقہ کار پر شدید تحفظات کا اظہار کیا گیا۔ قرارداد میں ججز کے انٹرویو کو مذاق قرار دیا گیا ہے۔

علی احمد کرد نے بتایا کہ انہوں نے ساتھیوں کے اصرار پر تحریک کی قیادت قبول کی ہے۔ ان کا کہنا تھا کہ اب معاملہ آئینی ترامیم تک محدود نہیں رہا بلکہ لوگوں کا سیاسی نظام سے اعتماد اٹھ چکا ہے۔

انہوں نے مزید کہا کہ عوام کی نظریں پاکستان کے وکلا پر ہیں اور اس تحریک میں عوام کو بھی شامل کیا جائے گا۔ پہلا عوامی جلسہ خیبرپختونخوا میں اور بیرون ملک مقیم پاکستانیوں کی دعوت پر لندن میں بھی پروگرام کیا جائے گا۔

واضح رہے کہ وکلا تحریک کا مقصد عدالتی نظام میں اصلاحات لانا اور عوامی اعتماد بحال کرنا ہے۔ اس تحریک کی سربراہی علی احمد کرد کو ان کے تجربے اور قیادت کی صلاحیتوں کی بنیاد پر دی گئی ہے۔