ابوظبی اور دبئی میں 20 جولائی سے پاکستانیوں کے لیے صرف ای پاسپورٹ جاری، موجودہ پاسپورٹ معیاد تک مؤثر رہیں گے۔
ابوظبی: (رائیٹ ناؤ نیوز) متحدہ عرب امارات میں 20 جولائی سے پاکستانیوں کے لیے صرف ای پاسپورٹ جاری کیے جائیں گے۔ اس فیصلے کا اطلاق ابوظبی اور دبئی کے سفارتی مشن پر ہوگا۔
سفارتی مشن کے بیان میں بتایا گیا ہے کہ ابوظبی اور دبئی میں پاسپورٹ درخواستیں صرف ای پاسپورٹ کیٹیگری میں ہی قبول ہوں گی۔ اس اقدام کا مقصد پاسپورٹ کے عمل کو جدید بنانا ہے۔
سفارتی مشن نے واضح کیا ہے کہ موجودہ مشین ریڈایبل پاسپورٹ اپنی مدت معیاد تک مؤثر رہیں گے اور بیرون ملک پاکستانیوں کے لیے آن لائن پاسپورٹ درخواست کی سہولت برقرار رہے گی۔
یہ اقدام سفری دستاویزات کی سکیورٹی کو بڑھانے اور بین الاقوامی معیار کے مطابق بنانے کے لیے اہم ہے۔ ای پاسپورٹ کی بدولت پاکستانی مسافروں کو اماراتی ایئرپورٹس پر بہتر سہولت ملے گی۔
یاد رہے کہ ای پاسپورٹ جدید ٹیکنالوجی کا حامل ہوتا ہے جو سفر کی حفاظت اور سہولت فراہم کرتا ہے۔ اس کے ذریعے مسافروں کی شناخت اور سرحدی عمل کو مؤثر بنایا جا سکتا ہے۔
