اسلام آباد: (رائیٹ ناوٴ نیوز) پاکستان اس وقت ایک سنگین طبی بحران کا سامنا کر رہا ہے، جہاں ایچ آئی وی/ایڈز کے کیسز میں خطرناک حد تک اضافہ دیکھا گیا ہے۔ ملک بھر میں اب تک ایڈز کے 1 لاکھ 8 ہزار 400 کیسز رپورٹ ہوئے ہیں۔

ایڈز کو ایک خاموش دشمن قرار دیا جاتا ہے، جس کی علامات اکثر ظاہر نہیں ہوتیں لیکن یہ وائرس تیزی سے پھیلتا ہے۔ ماہرین صحت اور حکام اس وبا کو روکنے کے لیے کوشاں ہیں۔

پنجاب میں ایڈز کے مریضوں کی تعداد سب سے زیادہ ہے، جہاں 45 ہزار افراد متاثر ہیں۔ لاہور اس وبا سے سب سے زیادہ متاثرہ شہر ہے، جہاں 10 ہزار سے زائد کیسز رپورٹ ہوئے ہیں۔

خیبرپختونخوا میں ایڈز کے مریضوں کی تعداد 39 ہزار 702 تک پہنچ چکی ہے، جبکہ سندھ میں 15 ہزار 639 افراد متاثر ہیں۔ ان علاقوں میں کیسز کی تعداد میں اضافہ ہو رہا ہے۔

واضح رہے کہ غیر محفوظ طبی طریقے، استعمال شدہ سرنجوں کا دوبارہ استعمال اور دیگر عوامل ایڈز کے کیسز میں اضافے کا سبب بن رہے ہیں۔ ماہرین نے خبردار کیا ہے کہ رپورٹ کیے گئے کیسز اصل تعداد کا صرف ایک حصہ ہوسکتے ہیں۔