جنیوا: (رائیٹ ناؤ نیوز) انٹرنیشنل اولمپک کمیٹی (آئی او سی) نے فیفا کے صدر جیانی انفانٹینو کے خلاف شکایت پر تحقیقات کرنے سے انکار کردیا ہے۔ انسانی حقوق کی تنظیم فیئر اسکوائر نے شکایت کی تھی کہ انفانٹینو نے امریکی صدر ڈونلڈ ٹرمپ کی حمایت میں بیان دیا ہے۔ شکایت میں انفانٹینو کے بیانات کو اولمپک چارٹر کی سیاسی غیر جانبداری کی خلاف ورزی قرار دیا گیا۔

یہ شکایت اس فیصلے سے جڑی ہے جس میں امریکا کے کھلاڑی فولارن بالوگن کی ریڈ کارڈ پابندی 12 ماہ کے لیے معطل کی گئی تھی۔ امریکی صدر ٹرمپ نے اعتراف کیا تھا کہ انہوں نے اس معاملے پر انفانٹینو سے بات کی تھی۔

آئی او سی نے کہا ہے کہ فیفا کی اندرونی گورننس اور کھیل کے قوانین اس کے ضابطہ اخلاق کے دائرہ اختیار میں نہیں آتے۔ آئی او سی کے مطابق یہ مسائل فیفا کی داخلی معاملات ہیں اور ان پر کارروائی نہیں کی جا سکتی۔

اس معاملے کو اہمیت اس لیے بھی دی جا رہی ہے کہ ناروے فٹبال فیڈریشن نے بھی فیفا کی ایتھکس کمیٹی سے رجوع کرنے پر غور شروع کیا ہے۔ اس سے فیفا کی ساکھ متاثر ہو سکتی ہے اور یہ معاملہ عالمی سطح پر بھی زیر بحث ہے۔

یاد رہے کہ فیفا نے امریکا کے فارورڈ فولارن بالوگن کی ریڈ کارڈ پابندی کو معطل کر دیا تھا تاکہ وہ بیلجیئم کے خلاف ناک آؤٹ میچ میں شرکت کر سکیں۔ تاہم امریکا کو اس میچ میں شکست ہوئی۔