پشاور: (رائیٹ ناؤنیوز) خیبرپختونخوا حکومت نے سرکاری ملازمین کے لیے نئے پے اسکیلز کا نوٹیفیکیشن جاری کر دیا ہے۔ اس فیصلے کے تحت سرکاری ملازمین کو نظرثانی شدہ بنیادی تنخواہیں ملیں گی۔

محکمہ خزانہ کے اعلامیے کے مطابق پرانے بنیادی پے اسکیلز 2022 کی جگہ یکم جولائی سے بیسک پے اسکیلز 2026 نافذ ہوں گے۔ تاہم، سالانہ انکریمنٹ ہر سال یکم دسمبر کو دیا جائے گا۔

نئے پے اسکیلز میں ایڈہاک ریلیف الاؤنس 2022 اور 2025 کو ضم کر دیا گیا ہے۔ صوبائی کابینہ نے خصوصی بجٹ اجلاس میں تنخواہوں کی نظرثانی کی منظوری دی تھی۔

نئے ایڈہاک ریلیف الاؤنس 2026 کو 7 فیصد مقرر کیا گیا ہے، جو یکم جولائی 2026 سے نافذ العمل ہوگا۔ کنٹریکٹ اور کنٹیجنٹ پیڈ اسٹاف بھی اس الاؤنس کے اہل ہوں گے۔

واضح رہے کہ خیبرپختونخوا حکومت نے سرکاری ملازمین کی سہولت کے لیے یہ اقدامات کیے ہیں تاکہ ان کی معاشی حالت بہتر ہو سکے۔