ریاض: (رائیٹ ناؤنیوز) سعودی عرب میں مقیم دو پاکستانیوں کو تمغۂ امتیاز سے نوازا گیا ہے۔ یہ اعزاز ریاض کے پاکستانی سفارتخانے میں ایک خصوصی تقریب میں پیش کیا گیا۔

تقریب میں پاکستان کے سفیر احمد فاروق نے دونوں پاکستانیوں کو یہ اعزاز صدر پاکستان کی جانب سے پیش کیا۔ یہ دونوں حضرات پاکستانی کمیونٹی، صحت اور حج کے شعبے میں خدمات سرانجام دے رہے ہیں۔

ڈاکٹر اسد اللہ رومی اور ابرار تنولی کو ان کی خدمات کے اعتراف میں یہ اعزاز دیا گیا۔ ڈاکٹر رومی پاکستان ڈاکٹر گروپ کے سابق صدر جبکہ ابرار تنولی پاکستان حج رضاکار گروپ کے کنوینئر ہیں۔

سفیر احمد فاروق نے تقریب میں خطاب کرتے ہوئے دونوں شخصیات کو مبارکباد دی۔ انہوں نے کہا کہ بیرون ملک مقیم پاکستانی اپنی خدمات سے پاکستان کا مثبت تشخص اجاگر کر رہے ہیں۔

واضح رہے کہ پاکستانی سول ایوارڈز کا مقصد ان افراد کی خدمات کو سراہنا ہے جو اپنے کام کے ذریعے پاکستان کی عزت بڑھاتے ہیں۔