لاس اینجلس: (رائیٹ ناوٴ نیوز) فلمی دنیا کے سب سے بڑے اعزازات، آسکر ایوارڈز، 2029 سے یوٹیوب پر براہِ راست نشر کیے جائیں گے، جہاں یہ دنیا بھر کے ناظرین کے لیے مفت دستیاب ہوں گے۔ اکیڈمی آف موشن پکچر آرٹس اینڈ سائنسز نے یوٹیوب کے ساتھ معاہدہ کیا ہے جو 101 ویں آسکرز سے 2033 تک جاری رہے گا۔

اکیڈمی اور یوٹیوب کے درمیان طے پانے والے معاہدے کے تحت نہ صرف آسکرز کی مرکزی تقریب بلکہ ریڈ کارپٹ، بیک اسٹیج مناظر اور دیگر خصوصی لمحات بھی یوٹیوب پر براہِ راست دکھائے جائیں گے۔ اس دوران اشتہارات بھی شامل ہوں گے اور مختلف زبانوں کے آڈیو ٹریکس اور کلوزڈ کیپشننگ کی سہولت بھی فراہم کی جائے گی۔

اکیڈمی کے چیف ایگزیکٹو بل کریمر اور صدر لینٹ ہاول ٹیلر نے کہا کہ اس معاہدے کا مقصد آسکرز کو عالمی ناظرین کے لیے مزید قابلِ رسائی بنانا ہے، جس سے سنیما کو فروغ ملے گا اور نئی نسل کو فلم سازی کی جانب راغب کیا جائے گا۔ یوٹیوب کے سی ای او نیل موہن نے بھی اس شراکت کو ثقافتی لحاظ سے اہم قرار دیا ہے۔

میڈیا رپورٹس کے مطابق یوٹیوب نے آسکرز کے حقوق کے لیے نو ہندسوں پر مشتمل رقم ادا کی ہے، جو ڈزنی/اے بی سی اور این بی سی یونیورسل کی پیشکش سے کہیں زیادہ تھی۔ ڈزنی اب تک سالانہ تقریباً 100 ملین ڈالر ادا کر رہا تھا، تاہم ریٹنگز میں کمی کے باعث وہ کم رقم پر آمادہ تھا۔

یہ فیصلہ ایسے وقت میں سامنے آیا ہے جب آسکرز کی ٹی وی ریٹنگز کم ہو چکی ہیں۔ 1998 میں آسکرز کو 57 ملین ناظرین نے دیکھا تھا، جبکہ حالیہ برسوں میں یہ تعداد 20 ملین سے بھی کم رہی ہے۔ ماہرین کا کہنا ہے کہ یوٹیوب پر منتقل ہونا ایک فطری اور اسٹریٹجک قدم ہے، جو آسکرز کو نئی زندگی دے سکتا ہے۔