نیویارک: (رائیٹ ناؤنیوز) امریکی سائنسدانوں نے تحقیق میں انکشاف کیا ہے کہ چند منٹ کی شدید ورزش جسم میں نمایاں حیاتیاتی تبدیلیاں پیدا کر سکتی ہے۔ اس تحقیق سے ظاہر ہوتا ہے کہ مختصر وقفے میں 30، 30 سیکنڈ کی سائیکلنگ جسم پر گہرے اثرات ڈالتی ہے۔

تحقیق کے مطابق، شدید ورزش کے بعد خون میں 714 پروٹینز میں نمایاں تبدیلیاں دیکھی گئیں، جبکہ معمولی ورزش کے بعد صرف 7 پروٹینز متاثر ہوئے۔ یہ فرق ظاہر کرتا ہے کہ ورزش کی شدت بھی جسم کے ردعمل میں اہم کردار ادا کرتی ہے۔

اس تحقیق میں شدید جسمانی سرگرمی کے دوران فعال ہونے والے کیمیائی سگنلز پر بھی توجہ دی گئی ہے، جن میں لیک-فے نامی مالیکیول شامل ہے، جو بھوک اور توانائی کے استعمال سے متعلق ہے۔

واضح رہے کہ تحقیق کے سربراہ ڈاکٹر پال کوہن نے کہا ہے کہ چند منٹ کی شدید ورزش بھی طاقتور حیاتیاتی ردعمل ظاہر کرتی ہے۔ یہ دریافت خاص طور پر ان افراد کے لیے اہم ہے جو طویل ورزش کے لیے وقت نہیں نکال پاتے۔

یاد رہے کہ ماہرین کا کہنا ہے کہ شدید ورزش ہر فرد کے لیے موزوں نہیں ہو سکتی اور کسی طبی مسئلے کا سامنا کرنے والے افراد کو ماہر صحت سے مشورہ کرنا چاہئے۔