اسلام آباد: (رائیٹ ناؤنیوز) پی ٹی اے نے موبائل کمپنیوں کی غیر معیاری سروس اور کوریج پر کارروائی کرتے ہوئے آپریٹرز کو 30 دن کی مہلت دی ہے۔ اس دوران انہیں خامیوں کو دور کرنا ہوگا اور اصلاحی پلان جمع کرانا ہوگا۔

پی ٹی اے کی رپورٹ کے مطابق گزشتہ 4 برس میں موبائل کمپنیوں کو 3 ارب 41 کروڑ روپے جرمانے عائد کیے گئے۔ ان کمپنیوں کو 20 وارننگ لیٹرز اور 86 شوکاز نوٹسز بھی جاری کیے گئے ہیں۔

پی ٹی اے نے خبردار کیا ہے کہ مقررہ مدت میں خامیاں دور نہ کرنے پر مزید سخت کارروائی کی جائے گی۔ اس اقدام کا مقصد ملک بھر میں موبائل سروس کے معیار اور کوریج کو بہتر بنانا ہے۔

یہ مسئلہ عوامی شکایات کی روشنی میں اٹھایا گیا ہے، جس میں صارفین نے سروس کی ناقص کوالٹی اور کوریج کی کمی کی شکایت کی تھی۔

یاد رہے کہ پی ٹی اے موبائل سروسز کی نگرانی اور معیار کو یقینی بنانے کیلئے مختلف اقدامات کر رہا ہے۔ یہ اقدام صارفین کی بہتر سروس کے حصول کیلئے اٹھایا گیا ہے۔