ممبئی: (رائیٹ ناوٴ نیوز)۔ بالی ووڈ فلم ‘حق’ کے ہدایتکار سپرن ورما نے بتایا ہے کہ اداکارہ یامی گوتم نے اپنے کردار کی گہرائی کو سمجھنے کے لیے قرآن پاک کا مطالعہ کیا۔ ان کا کردار ‘شازیہ بانو’ کو حقیقت کے قریب لانے کی کوشش کے تحت یہ مطالعہ کیا گیا۔

ہدایتکار نے برطانوی نشریاتی ادارے کو بتایا کہ یامی گوتم نے قرآن پاک سے رہنمائی لی اور اس عمل میں انہیں تقریباً چار ماہ لگے۔ فلم میں قرآن کے حوالہ جات بھی شامل کیے گئے ہیں اور اختتام لفظ ‘اقراء’ پر کیا گیا ہے۔

سپرن ورما نے کہا کہ فلم ‘حق’ میں اسلام کے متعلق غلط فہمیوں کو دور کرنے کی کوشش کی گئی ہے۔ فلم کی تیاری کے دوران اسلامی قوانین اور سماجی پہلوؤں پر ڈیڑھ سال تک تحقیق کی گئی۔

فلم میں ‘تین طلاق’ جیسے موضوعات پر موجود غلط فہمیوں کو دور کرنے کی کوشش کی گئی ہے۔ اس کے علاوہ مہر کے تصور کو بھی سماجی معاہدے کے طور پر اجاگر کیا گیا ہے۔

واضح رہے کہ فلم ‘حق’ شازیہ بانو نامی خاتون کی کہانی سے متاثر ہو کر بنائی گئی ہے۔ یہ کہانی جگنا وورا کی کتاب ‘بانو: بھارت کی بیٹی’ سے ماخوذ ہے اور حقیقی واقعات سے متاثر بتائی جاتی ہے۔