صنعا: (رائیٹ ناؤنیوز) یمن کی بین الاقوامی طور پر تسلیم شدہ حکومت نے صنعا ایئرپورٹ پر یمنی فورسز کے حملے کی تصدیق کی ہے۔ یہ حملہ اس وقت ہوا جب حوثی باغی ایک ایرانی طیارے کو لینڈ کروانے کی کوشش کر رہے تھے۔

یمنی حکومت کے مطابق اس کارروائی کا مقصد ایران کے سویلین طیارے کو صنعا میں اترنے سے روکنا تھا۔ ایرانی طیارہ حوثی وفد کو تہران سے واپس لا رہا تھا۔

یمنی وزارت دفاع نے حملے سے قبل شہریوں اور ایئرپورٹ عملے کو علاقے سے دور رہنے کی ہدایت دی تھی۔ حوثیوں نے سعودی عرب پر حملے کا الزام لگاتے ہوئے جوابی کارروائی کا اعلان کیا ہے۔

اس واقعے نے خطے میں کشیدگی کو مزید بڑھا دیا ہے۔ حوثی باغیوں کا کہنا ہے کہ وہ سعودی عرب کی اہم تنصیبات کو نشانہ بنا سکتے ہیں۔

واضح رہے کہ یمن گزشتہ کئی سالوں سے خانہ جنگی کا شکار ہے۔ سعودی عرب کی قیادت میں فوجی اتحاد نے حوثیوں کے خلاف کارروائیاں کی ہیں، جبکہ اقوام متحدہ نے جنگ بندی کی کوششیں کی ہیں۔