اسلام آباد: (رائیٹ ناؤ نیوز) پاکستان نے بھارتی وزیر دفاع کے حالیہ بیان کو سختی سے مسترد کرتے ہوئے اسے خطے کے امن کے لیے خطرہ قرار دیا ہے۔ دفتر خارجہ نے کہا ہے کہ ہر جارحیت کا منہ توڑ جواب دیا جائے گا۔

دفتر خارجہ کے بیان میں کہا گیا ہے کہ بھارتی وزیر دفاع کے ریمارکس جموں و کشمیر کے مسئلے کی حقیقت کو مسخ کرتے ہیں۔ یہ بیان بھارتی حکومت کی خطے کے امن کو خطرے میں ڈالنے کی پالیسی کو ظاہر کرتا ہے۔

بیان کے مطابق، اس قسم کے بیانات کا مقصد بھارت کے زیر انتظام جموں و کشمیر میں جاری قبضے اور بھارت کے اندرونی مسائل سے توجہ ہٹانا ہے۔ دفتر خارجہ نے بھارت کو زمینی حقائق کا ادراک کرنے کی نصیحت کی ہے۔

بیان میں کہا گیا ہے کہ پاکستان کی حکومت، عوام اور مسلح افواج کسی بھی ممکنہ مہم جوئی کا بھرپور جواب دینے کی مکمل صلاحیت رکھتے ہیں۔ گزشتہ سال کے آپریشن "بنیان مرصوص” میں پاکستان نے اپنے دفاع کے عزم کا عملی مظاہرہ کیا تھا۔

یاد رہے کہ پاکستان نے عالمی برادری، خصوصاً اقوام متحدہ، سے بھارت کے غیر ذمہ دارانہ طرز عمل کا نوٹس لینے اور سلامتی کونسل کی قراردادوں پر عمل درآمد کرنے کی اپیل کی ہے۔