روم: (رائیٹ ناؤ نیوز) امریکی وزیر خارجہ مارکو روبیو نے ایران کے ممکنہ جواب پر تبصرہ کرتے ہوئے کہا ہے کہ ایران کی جانب سے آج جواب موصول ہوجانا چاہئے۔ ان کا کہنا تھا کہ امریکا ایران کو جوہری ہتھیار حاصل کرنے کی اجازت نہیں دے سکتا اور توقع کی جاتی ہے کہ تہران کے ساتھ مذاکرات آگے بڑھیں گے۔

مارکو روبیو نے بتایا کہ امریکی نیوی نے ایران جانے والے 70 ٹینکرز کا راستہ روکا ہوا ہے، جبکہ ایران آبنائے ہرمز پر کنٹرول چاہتا ہے۔ انہوں نے کہا کہ بین الاقوامی سمندری راستوں پر کسی ایک ملک کا کنٹرول قبول نہیں کیا جا سکتا۔

امریکی وزیرخارجہ نے واضح کیا کہ گزشتہ رات ایران پر کیے گئے حملے آپریشن ‘ایپک فیوری’ کا حصہ نہیں تھے۔ انہوں نے خبردار کیا کہ اگر امریکا پر میزائل فائر کیے گئے تو بھرپور جواب دیا جائے گا۔

واضح رہے کہ امریکا عالمی تنازعات کے حل کیلئے سفارتی کوششیں جاری رکھے گا۔ مارکو روبیو نے کہا کہ امریکا روس یوکرین جنگ بندی میں ثالثی کیلئے تیار ہے، لیکن عملی پیشرفت نہ ہونے کی صورت میں وقت ضائع نہیں کیا جائے گا۔

یاد رہے کہ ایران کی جانب سے جواب موصول نہ ہونے کے باوجود واشنگٹن نے تائیوان اور چین کے معاملے پر اپنے مؤقف میں کوئی تبدیلی نہیں کی۔ امید کی جا رہی ہے کہ امریکی صدر کے دورۂ چین کے دوران ان معاملات پر بات چیت ہو سکتی ہے۔