ماسکو: (رائیٹ ناؤنیوز) کریملن کے ترجمان دیمتری پیسکوف نے کہا ہے کہ کیف حکومت کی دہشت گرد سرگرمیاں بڑھ رہی ہیں۔ روس کے خصوصی فوجی آپریشن کی کامیابی نہ صرف ملک بلکہ عالمی سطح پر اہمیت رکھتی ہے۔

دیمتری پیسکوف نے صحافیوں سے گفتگو میں بتایا کہ کیف حکومت کی دہشت گرد کارروائیاں جاری ہیں اور ان کا جغرافیائی دائرہ مسلسل بڑھ رہا ہے۔ عراق میں یوکرینی جنگجوؤں کی سرگرمیاں اس کا ثبوت ہیں۔

کریملن کے ترجمان نے مزید کہا کہ کیف حکومت جرمنی میں نارڈ سٹریم گیس پائپ لائن اور قازقستان میں کیسپین پائپ لائن پر حملوں میں بھی ملوث رہی ہے۔

دیمتری پیسکوف نے کہا کہ کیف حکومت کی سرگرمیوں کے پھیلاؤ سے روس کے خصوصی فوجی آپریشن کی کامیابی کی اہمیت بڑھ گئی ہے۔

واضح رہے کہ یہ بیان ایسے وقت میں آیا ہے جب روس اور یوکرین کے درمیان الزامات اور جوابی الزامات کا سلسلہ جاری ہے۔