کراچی: (رائیٹ ناوٴ نیوز)۔ پاکستان کرپٹو کونسل کے سی ای او بلال ثاقب نے ایکسچینج ایسوسی ایشن کو کرپٹو لائسنس جاری کرنے کا عندیہ دیا ہے۔ ان کا کہنا ہے کہ کرپٹو کرنسی مستحکم ہونے پر اوورسیز پاکستانیوں کی ترسیلات لمحوں میں منتقل ہو سکیں گی۔

ایکسچینج ایسوسی ایشن آف پاکستان کے چیئرمین ملک محمد بوستان نے بتایا کہ انہوں نے کرپٹو کونسل کے سی ای او بلال ثاقب کے ساتھ اہم ملاقات کی ہے۔ ملاقات میں ای کیپ کے صدر ظفر پراچہ و دیگر عہدیدار بھی موجود تھے۔

بلال ثاقب نے کہا کہ کرپٹو کرنسی کی مستحکم صورتحال سے ترسیلات زر کا حجم 38 ارب ڈالر سے 50 ارب ڈالر تک پہنچ سکتا ہے۔ انہوں نے نوجوان قیادت کی کوششوں کو سراہا جن کی بدولت کرپٹو کونسل کو قانونی حیثیت ملی۔

انہوں نے کہا کہ اسٹیٹ بینک آف پاکستان اور ایس ای سی پی کرپٹو ٹریڈنگ کے خواہشمندوں کو کونسل کی این او سی سے مشروط کرپٹو اکاوٴنٹس کھولنے کی اجازت دے چکے ہیں۔ اجلاس میں بتایا گیا کہ چار کروڑ پاکستانی کرپٹو میں پانچ سے چھ فیصد لاگت پر ٹریڈنگ کر رہے ہیں۔

یاد رہے کہ کرپٹو کرنسی ڈیجیٹل دور کے تقاضوں سے مطابقت رکھتا ہے اور اس کی قانونی حیثیت پاکستان میں بڑھتی جا رہی ہے۔ ڈیجیٹل لائسنس کے اجرا سے کرپٹو ٹریڈنگ کی لاگت میں بھی کمی ممکن ہے۔