واشنگٹن: (رائیٹ ناوٴ نیوز)۔ کانگریس کی ہاؤس آرمڈ سروسز کمیٹی میں امریکی وزیرِ دفاع پیٹ ہیگستھ کو ایران جنگ کے حوالے سے سخت سوالات کا سامنا کرنا پڑا۔ ان سے ایران کے جوہری پروگرام اور دفاعی پالیسی پر واضح حکمت عملی بیان کرنے کا مطالبہ کیا گیا۔

کمیٹی کے سامنے پیشی کے دوران، ہیگستھ نے 1.5 ٹریلین ڈالر دفاعی بجٹ کا دفاع کیا اور ایران کے حوالے سے پالیسی سوالات کے جواب دیے۔ انہوں نے کہا کہ امریکی افواج کی تنخواہوں میں 7 فی صد اضافہ ہو رہا ہے۔

حکومت کی جانب سے ایران کے خلاف جنگی تیاریوں کی وضاحت کرتے ہوئے، ہیگستھ نے کہا کہ امریکی دفاعی صنعتی نظام کو جنگی سطح پر لانے کی کوششیں جاری ہیں۔ انہوں نے ایران کے ساتھ جاری کشیدگی کے تناظر میں دفاعی صنعت کی مضبوطی کو ضروری قرار دیا۔

واضح رہے کہ ایران جنگ پر امریکی اخراجات تقریباً 25 ارب ڈالر تک پہنچ چکے ہیں اور 13 امریکی فوجی اہلکار ہلاک ہو چکے ہیں۔ اس جنگ کے اخراجات اور اثرات پر امریکی کانگریس میں سیاسی بحث جاری ہے۔

یاد رہے کہ ایران کے جوہری تنصیبات پر حملے کے بعد سے دونوں ممالک کے درمیان کشیدگی بڑھ گئی ہے۔ امریکی حکومت ایران کو جوہری عزائم ترک کرنے پر مجبور کرنے کی کوشش کر رہی ہے۔