نیویارک: (رائیٹ ناوٴ نیوز) مصنوعی ذہانت کے چیٹ بوٹس اب صارفین کی عادات اور ترجیحات محفوظ رکھنے کے قابل ہیں۔ ماہرین کے مطابق صارفین کو اپنے ڈیجیٹل پروفائل کا جائزہ لینے کی تجویز دی گئی ہے۔

رپورٹ کے مطابق چیٹ جی پی ٹی، کلاڈ اور جیمنائی صارفین کی ذاتی معلومات جیسے گفتگو کا انداز، پسندیدہ زبان اور دلچسپیاں محفوظ کرتے ہیں۔ صارفین اپنی ایپ کی سیٹنگز میں جا کر اس یادداشت کو دیکھ اور حذف کر سکتے ہیں۔

کچھ پلیٹ فارمز صارفین کو دوسرے چیٹ بوٹس سے یادداشت درآمد کرنے کی سہولت بھی فراہم کر رہے ہیں۔ ماہرین کا کہنا ہے کہ اس سے نئے پلیٹ فارم پر منتقلی آسان ہو جاتی ہے اور صارف کو دوبارہ ترجیحات سمجھانے کی ضرورت نہیں پڑتی۔

عارضی گفتگو کا آپشن بھی دستیاب ہے، جس کے ذریعے چیٹ تاریخ محفوظ نہیں ہوتی۔ یہ موڈ ان صارفین کے لیے اہم ہے جو نجی گفتگو الگ رکھنا چاہتے ہیں۔

واضح رہے کہ مصنوعی ذہانت کی بڑھتی ہوئی شخصی نوعیت نے سہولت کے ساتھ نگرانی کے خدشات بھی بڑھا دیے ہیں۔ اسی لیے اب بہت سے صارفین اپنے چیٹ بوٹ کی محفوظ یادداشت کا جائزہ لے رہے ہیں۔