اسلام آباد: (رائیٹ ناوٴ نیوز) وفاقی وزیر پارلیمانی امور طارق فضل چوہدری نے ایکس (X) پر بیان دیا ہے کہ زلفی بخاری اور عمران خان کے بیٹوں کی حالیہ سرگرمیاں واضح سیاسی ایجنڈے کی عکاسی کرتی ہیں۔

انہوں نے کہا کہ سیاسی مقاصد کے لیے قومی مفادات کو پس پشت ڈال کر ذاتی بیانیہ آگے بڑھایا جا رہا ہے۔ ان کا کہنا تھا کہ ایسے اقدامات ملک کے لیے نقصان دہ ہیں۔

طارق فضل نے مزید کہا کہ عارف اجاکیہ جیسے متنازعہ افراد سے ملاقاتیں ایک سوچے سمجھے بیانیے کا حصہ ہیں۔ کچھ عناصر عالمی سطح پر پاکستان کے خلاف فضا بنانے کی کوشش کر رہے ہیں۔

ان کے مطابق، ملک کو اتحاد، استحکام اور ذمہ دار قیادت کی ضرورت ہے۔ انہوں نے سوال اٹھایا کہ کیا یہی وہ تبدیلی کی سیاست ہے جس کا دعویٰ کیا گیا تھا؟

یاد رہے کہ ماضی میں بھی بعض شخصیات پر قومی مفادات کے خلاف سرگرمیوں میں ملوث ہونے کے الزامات لگتے رہے ہیں۔