لاہور: (رائیٹ ناوٴ نیوز) پاکستان سپر لیگ (پی ایس ایل) کی ٹیم راولپنڈیز کے کپتان محمد رضوان نے مسلسل سات میچز میں ناکامی کی وجہ بیان کی ہے۔ لاہور قلندرز کے ہاتھوں شکست کے بعد پریس کانفرنس میں انہوں نے اپنی کارکردگی کو ناکامی کی وجہ قرار دیا۔

انہوں نے کہا کہ ان کی کارکردگی اچھی نہیں رہی جس سے ٹیم کے نتائج متاثر ہوئے۔ ان کا کہنا تھا کہ نوجوان کھلاڑی کے ساتھ اوپن کرتے ہوئے انہیں کچھ مشکلات کا سامنا رہا، مگر ٹیم کا فیصلہ متفقہ ہوتا ہے۔

محمد رضوان نے مزید کہا کہ مسلسل شکستوں کے باوجود کچھ چیزیں حوصلہ افزا بھی رہیں۔ انہوں نے کہا کہ ٹیم میں کوئی واضح کمی نظر نہیں آتی، مگر قسمت ساتھ نہیں دے رہی۔

انہوں نے کہا کہ لیڈر کو صرف نتائج سے نہیں جانچنا چاہیے، کپتان کی حیثیت سے ان کی کوشش ہمیشہ رہتی ہے۔ اگر غلطیاں ہوں تو ان پر قابو پانا مشکل ہوتا ہے۔

واضح رہے کہ لاہور قلندرز نے راولپنڈیز کو 32 رنز سے شکست دی، جس کے بعد راولپنڈیز ٹورنامنٹ سے باہر ہو گئی۔ یہ ان کی مسلسل ساتویں شکست تھی، اور وہ ایک بھی میچ جیتنے میں ناکام رہے۔