کراچی: (رائیٹ ناؤ نیوز) خواتین میں اولاد نہ ہونے کے سماجی دباؤ کی وجہ سے سوڈوسائسیس کا امکان بڑھ جاتا ہے۔ یہ کیفیت ان خواتین میں پائی جاتی ہے جو خود کو حاملہ سمجھتی ہیں جبکہ حقیقت میں وہ حاملہ نہیں ہوتیں۔

ماہرینِ امراضِ نسواں کے مطابق سوڈوسائسیس (Pseudocyesis) ایک طبی حالت ہے جہاں خاتون جسمانی اور نفسیاتی طور پر حمل کی علامات محسوس کرسکتی ہیں۔ پروفیسر نصرت شاہ نے بتایا کہ نفسیاتی، جذباتی اور بعض صورتوں میں ہارمونل عوامل اس کیفیت کے پیچھے ہوسکتے ہیں۔

پروفیسر شاہ کے مطابق اولاد کی خواہش اور معاشرتی دباؤ کے باعث خواتین نفسیاتی اذیت میں مبتلا ہوسکتی ہیں۔ بعض خواتین شوہر کی دوسری شادی کے خوف یا سماجی مسائل کی وجہ سے ذہنی دباؤ کا شکار ہوتی ہیں۔

ماہرین نے زور دیا ہے کہ ایسی خواتین کو مورد الزام ٹھہرانے کے بجائے ان کی ذہنی کیفیت کو سمجھنا ضروری ہے۔ ان کو نفسیاتی مدد کی فراہمی پر بھی توجہ دی جائے۔

یاد رہے کہ سوڈوسائسیس حقیقی حمل نہیں ہوتا اور اس کا پتہ الٹراساؤنڈ کے ذریعے لگایا جا سکتا ہے۔ بانجھ پن یا حمل میں تاخیر کو صرف خاتون کی ذمہ داری سمجھنا غلط ہے۔