واشنگٹن: (رائیٹ ناؤ نیوز) ایک نئی تحقیق میں معلوم ہوا ہے کہ آکسیلیٹ مرکب والی غذائیں آنتوں کی سوزش کی بیماری (آئی بی ڈی) میں مبتلا افراد کے لیے نقصان دہ ہوسکتی ہیں۔ ان غذاؤں میں پالک، بادام اور شکر قندی شامل ہیں۔

امریکی یو این سی اسکول آف میڈیسن کی تحقیق کے مطابق آکسیلیٹ مرکب آنتوں کی سوزش میں اضافہ کر سکتا ہے۔ تحقیق میں آنتوں کی بیماری کے مریضوں اور صحت مند افراد کے ٹشوز کا جائزہ لیا گیا۔

تحقیق میں بتایا گیا ہے کہ صحت مند افراد میں آکسیلیٹ جسم سے خارج ہوجاتا ہے، جبکہ آئی بی ڈی کے مریضوں میں یہ پروٹینز کی کمی کی وجہ سے مشکل ہوتا ہے۔

یہ پروٹینز، ایس ایل سی 26 اے 2 اور ایس ایل سی 26 اے 3، آنتوں کے نظام میں اہم کردار ادا کرتے ہیں۔ ان کی کمی سے سوزش زیادہ ہوتی ہے اور ٹشوز میں ان پروٹینز کی کمی دیکھی گئی۔

واضح رہے کہ اس تحقیق کے نتائج غذاؤں کے اثرات کو سمجھنے میں مددگار ثابت ہوسکتے ہیں۔ تاہم، مریضوں کو اپنی خوراک میں تبدیلی کے لیے ماہرِ غذائیت سے مشورہ لینا چاہیے۔