اسلام آباد: (رائیٹ ناؤ نیوز) وفاقی وزیر برائے پارلیمانی امور طارق فضل چوہدری نے کہا ہے کہ اگر نئے صوبے پاکستان کے مفاد میں ہیں تو انہیں ضرور بننا چاہیے۔ انہوں نے سوشل میڈیا پر نجی ٹی وی کے پروگرام کی ویڈیو شیئر کرتے ہوئے یہ بات کہی۔

انہوں نے مزید کہا کہ نئے صوبوں کے قیام پر مثبت اور صحت مند بحث کا آغاز ہونا چاہیے۔ تمام سیاسی جماعتوں اور عوام کو اس بحث کا حصہ بننا چاہیے تاکہ یہ معاملہ اتفاقِ رائے سے حل ہو۔

وفاقی وزیر نے کہا کہ یہ اہم فیصلے زبردستی مسلط نہیں کیے جا سکتے۔ یہ معاملہ پارلیمنٹ سے متعلق ہے، اور وہاں بھی سیر حاصل بحث ہونی چاہیے تاکہ ہر پہلو کا جائزہ لیا جا سکے۔

طارق فضل چوہدری نے زور دیا کہ سیاسی جماعتوں کو اپنے مفادات سے بالاتر ہو کر پاکستان کے عوام کے مفادات کو مدنظر رکھنا چاہیے۔ انہوں نے کہا کہ اس معاملے پر سیاست سے بالاتر ہو کر بات چیت ہونی چاہیے۔

واضح رہے کہ بھارت نے 1950 میں کمیشن بنا کر صوبوں کی تشکیل کی۔ بھارتی پنجاب سے ہماچل پردیش، ہریانہ اور پنجاب بنے۔ اگر پاکستان میں نئے صوبے بنانا مفید ہو تو انہیں بننا چاہیے، مگر تقسیم کے خدشات کو مدنظر رکھ کر۔