مظفرآباد: (رائیٹ ناؤ نیوز) مظفرآباد میں آزاد کشمیر قانون ساز اسمبلی کی مخصوص نشستوں کے لئے پولنگ کا عمل جاری ہے۔ دوپہر دو بجے اسمبلی کا اجلاس ہوگا جس میں نومنتخب اراکین حلف اٹھائیں گے۔

مخصوص نشستوں کے لئے خواتین کی 5 نشستوں پر 6 امیدوار مدمقابل ہیں۔ مسلم لیگ ن کی 4 اور پیپلزپارٹی کی 2 امیدوار خواتین کی مخصوص نشستوں کے لئے حصہ لے رہی ہیں۔

ٹیکنوکریٹ کی ایک نشست پر ن لیگ کے بیرسٹر افتخار گیلانی اور پیپلزپارٹی کے صاحبزادہ ذوالفقار کے درمیان مقابلہ ہے۔ علماء مشائخ کی نشست کے لئے ن لیگ کے مظہر سعید اور پیپلزپارٹی کے حافظ طارق کی جدوجہد جاری ہے۔

ترجمان الیکشن کمیشن نے بتایا کہ اوورسیز کشمیریوں کی نشست پر ن لیگ کے عبدالرحمان آرائیں بلا مقابلہ منتخب ہو گئے ہیں۔ اس نشست پر کوئی امیدوار کاغذات جمع نہیں کرا سکا۔

واضح رہے کہ مخصوص نشستوں کی پولنگ کے بعد آزاد کشمیر قانون ساز اسمبلی کا اجلاس ہوگا۔ اس میں نومنتخب اراکین حلف اٹھائیں گے اور اسپیکر و ڈپٹی اسپیکر کے انتخابات کے لئے شیڈول جاری ہونے کا امکان ہے۔