نیویارک: (رائیٹ ناؤ نیوز) درمیانی عمر میں تین اہم عوامل سے بچنے سے بڑھاپے میں ڈیمینشیا سے محفوظ رہنے کا موقع مل سکتا ہے۔ تحقیق کے مطابق 45 سے 65 سال کی عمر میں ان عناصر کا خیال رکھ کر دماغی صحت کو بہتر بنایا جاسکتا ہے۔

نیویارک یونیورسٹی کی تحقیق میں 12 ہزار سے زائد افراد کا تجزیہ کیا گیا۔ ان میں سے 55 سال کی عمر میں ڈیمینشیا سے محفوظ افراد کا ڈیٹا شامل تھا۔ محققین نے ہائی بلڈ پریشر، ذیابیطس اور تمباکو نوشی جیسے عوامل کا تجزیہ کیا۔

تحقیق کے دوران ان افراد کی صحت کا جائزہ 26 سال تک لیا گیا۔ اس عرصے میں 3 ہزار سے زائد افراد ڈیمینشیا کا شکار ہوئے، جبکہ 5200 افراد کا انتقال ہوا مگر وہ اس بیماری سے متاثر نہیں ہوئے۔

تحقیق میں معلوم ہوا کہ جو لوگ ان خطرے کے عوامل سے محفوظ تھے، ان میں ڈیمینشیا کی تشخیص 13 سال تاخیر سے ہوئی۔ مردوں کے مقابلے میں خواتین زیادہ عرصے تک ڈیمینشیا سے پاک زندگی گزارتی ہیں۔

یاد رہے کہ تحقیق کے مطابق ان عوامل سے بچاؤ سے دماغی صحت کو طویل عرصے تک محفوظ رکھا جاسکتا ہے۔ ان عوامل میں ہائی بلڈ پریشر، ذیابیطس اور تمباکو نوشی شامل ہیں۔