اسلام آباد: (رائیٹ ناؤ نیوز) فیڈرل بورڈ آف ریونیو (ایف بی آر) نے اہم ڈیجیٹل سسٹمز کی اپ گریڈیشن کے لیے مینٹیننس شیڈول جاری کر دیا ہے۔ اس دوران متعدد آن لائن خدمات دو روز سے زائد عرصے تک معطل رہیں گی۔

ایف بی آر کے مطابق مینٹیننس کا آغاز ہفتہ 8 اگست 2026 کو رات 12 بج کر 30 منٹ پر ہوگا اور یہ پیر 10 اگست 2026 کو صبح 5 بجے تک جاری رہے گا۔ مجموعی طور پر 52 گھنٹے 30 منٹ تک اہم پلیٹ فارمز بند رہیں گے۔

اس دوران آئی آر آئی ایس (IRIS)، ڈیجیٹل انوائسنگ، پیمنٹ سسٹم، اور دیگر آن لائن سہولیات دستیاب نہیں ہوں گی۔ ایف بی آر نے کہا کہ ٹیکس دہندگان ان سہولیات کو استعمال نہیں کر سکیں گے۔

ایف بی آر نے ٹیکس دہندگان کو ہدایت کی ہے کہ وہ مینٹیننس سے پہلے اپنے تمام ضروری کام مکمل کریں تاکہ کسی پریشانی یا تاخیر سے بچا جا سکے۔ ٹیکس ریٹرنز، ادائیگیاں اور رجسٹریشن کا عمل بروقت مکمل کریں۔

واضح رہے کہ ایف بی آر نے یقین دہانی کرائی ہے کہ مینٹیننس مکمل ہوتے ہی خدمات بحال کر دی جائیں گی اور ممکنہ زحمت پر معذرت کی ہے۔