چولپون آتا: (رائیٹ ناؤ نیوز) نائب وزیراعظم اسحاق ڈار نے کہا ہے کہ اسلام آباد میں ہونے والے مذاکرات کے بعد ایران اور امریکہ کے مابین 47 سال بعد براہ راست رابطے بحال ہوئے ہیں۔ انہوں نے عالمی برادری کو اسلام آباد مفاہمتی یادداشت سے پیدا ہونے والے مواقع سے فائدہ اٹھانے کا مشورہ دیا ہے۔

اجلاس میں اسحاق ڈار نے کہا کہ پاکستان نے اپریل میں ایران اور امریکہ کے درمیان مذاکرات کی میزبانی کی تھی۔ ان کا کہنا تھا کہ تنازعات کا مستقل حل مذاکرات، سفارتکاری اور باہمی احترام سے ہی ممکن ہے۔

اسحاق ڈار نے کہا کہ شنگھائی تعاون تنظیم (ایس سی او) افغان طالبان پر زور دے کہ وہ انسداد دہشت گردی کے وعدے پورے کریں۔ ان کے مطابق افغان طالبان دہشت گرد گروہوں کو سازگار ماحول فراہم کررہے ہیں۔

انہوں نے کہا کہ افغان سرزمین سے دہشت گردی پاکستان کے لئے بڑا سیکیورٹی چیلنج ہے۔ پاکستان ایک پرامن، مستحکم اور خوشحال افغانستان کا خواہاں ہے۔ ایس سی او دہشت گردی اور انتہاپسندی کے خلاف مؤثر تعاون کررہی ہے۔

واضح رہے کہ ایس سی او کے رکن ممالک کے درمیان تجارت میں کئی گنا اضافہ ہوا ہے۔ یہ فورم معیشت، ثقافت اور امن کے فروغ کے لئے ایک جامع پلیٹ فارم بن چکا ہے۔