اسلام آباد: (رائیٹ ناؤ نیوز) نائب وزیراعظم اور وزیر خارجہ اسحاق ڈار نے شنگھائی تعاون تنظیم کے وزرائے خارجہ اجلاس کے دوران ایران کے وزیر خارجہ عباس عراقچی سے ملاقات کی۔ دونوں رہنماؤں نے خطے کی بدلتی ہوئی صورتحال پر غور کیا۔

دفتر خارجہ کے ترجمان نے بتایا کہ ملاقات میں پاک ایران قریبی اور برادرانہ تعلقات کے عزم کا اعادہ کیا گیا۔ اسحاق ڈار نے حالیہ علاقائی کشیدگی پر گہری تشویش کا اظہار کیا۔

اسحاق ڈار نے امن و استحکام کے لیے مکالمے کی ضرورت پر زور دیا اور کہا کہ کشیدگی میں کمی اور سفارتی روابط کی اہمیت کو سمجھنا ضروری ہے۔

ترجمان کے مطابق، اسحاق ڈار نے اسلام آباد ایم او یو کے تحت مفاہمت پر مؤثر عملدرآمد کی ضرورت پر بھی زور دیا۔ اس ملاقات میں تعاون کو مزید آگے بڑھانے کی بات کی گئی۔

واضح رہے کہ پاکستان اور ایران کے درمیان دیرینہ تعلقات ہیں اور دونوں ممالک خطے میں اہم کردار ادا کرتے ہیں۔