کراچی: (رائیٹ ناؤ نیوز) کراچی کے کلثوم بائی ولیکا اسپتال میں 16 بچوں میں ایچ آئی وی کی تشخیص ہوئی ہے۔ اس انکشاف کے بعد محتسب سندھ نے اسپتال کی کارکردگی کا جائزہ لیا۔

صوبائی محتسب محمد سہیل راجپوت نے اس معاملے پر اجلاس کی صدارت کی۔ اجلاس میں سیکرٹری لیبر سندھ، کمشنر سیسی، سینئر میڈیکل ایڈوائزر، متاثرہ بچوں کے والدین اور دیگر متعلقہ افراد شریک ہوئے۔

اجلاس میں بتایا گیا کہ مزید کیسز سامنے آنے کا خدشہ ہے۔ والدین نے اسپتال انتظامیہ کے عدم تعاون اور علاج کے اخراجات میں تاخیر کی شکایات کی ہیں۔

محتسب سندھ نے کہا کہ اسپتال کے مالی معاملات ایچ آئی وی پھیلاؤ کی وجہ بنے ہیں۔ اسپتال میں ماہر ڈاکٹروں کی تعیناتی اور دیگر ضروری اقدامات کی ہدایت کی گئی ہے۔

یاد رہے کہ گذشتہ 4 ماہ میں بچوں میں ایچ آئی وی کا غیر معمولی اضافہ ہوا ہے۔ رپورٹ کے مطابق 30 آٹو ڈس ایبل سرنجز غیر معیاری پائی گئی ہیں۔