واشنگٹن: (رائیٹ ناؤ نیوز) امریکا میں زیر تعلیم طلبا کے ویزوں میں توسیع سخت جانچ پڑتال کے عمل سے مشروط کر دی گئی ہے۔ امریکی محکمہ خارجہ نے داخلی سلامتی کے محکمہ کے حتمی ضابطے کا اعلان کیا ہے، جس کے تحت ‘مدت قیام’ کا قانونی سقم ختم کر دیا گیا ہے۔

یہ سقم غیر ملکی طلبا، تبادلہ پروگرام کے شرکا اور غیر ملکی ذرائع ابلاغ کے نمائندوں کو امریکا میں حکومتی نگرانی کے بغیر طویل قیام کی اجازت دیتا تھا۔ نئے ضابطے کے تحت، ایف، جے اور آئی ویزا رکھنے والے افراد کی امریکا میں قیام کی مدت مقرر کر دی گئی ہے۔

امریکی محکمہ خارجہ کے مطابق ایف اور جے ویزا کی مدت چار سال سے زیادہ نہیں ہوگی اور توسیع کی منظوری وفاقی سطح پر لازم ہوگی۔ درخواست گزاروں کو بائیومیٹرک تصدیق، پس منظر کی جانچ اور دھوکہ دہی کی چھان بین کے مراحل سے گزرنا ہوگا۔

یہ تبدیلی غیر ملکی طلبا کی تعداد کو محدود کر سکتی ہے، جس کا اثر تعلیمی اداروں پر پڑ سکتا ہے۔ امریکی محکمہ خارجہ نے ایف ون ویزا والے طلبا کے لیے ملک چھوڑنے کی رعایتی مدت 60 دن سے کم کر کے 30 دن کر دی ہے۔

یاد رہے کہ امریکا میں غیر ملکی طلبا کی تعداد میں اضافہ ہوا ہے، جو امریکی معیشت میں اہم کردار ادا کرتے ہیں۔ اس نئے ضابطے کا مقصد سلامتی کو یقینی بنانا اور قانونی عمل کو مضبوط کرنا ہے۔