تہران: (رائیٹ ناؤ نیوز) ایران نے اپنی سرزمین پر امریکی حملوں کی مذمت کی اور کہا ہے کہ ان حملوں نے تمام سفارتی کوششوں کو ناکام بنا دیا ہے۔ ایرانی وزارت خارجہ کے مطابق، امریکا کے ساتھ اسلام آباد ایم او یو جنگ بندی معاہدہ ختم ہوچکا ہے۔

ایرانی وزارت خارجہ کے ترجمان اسماعیل بقائی نے کہا کہ ایران نے کبھی معاہدے کی خلاف ورزی نہیں کی جبکہ امریکا نے بار بار خلاف ورزی کی ہے۔ ان کے بقول، جب تک امریکا اپنی ذمہ داریاں پوری نہیں کرتا، ایران بھی ایم او یو پر عمل نہیں کرے گا۔

ایرانی وزارت خارجہ نے مزید کہا کہ امریکی حملے اقوام متحدہ کے چارٹر اور ریاستی خودمختاری کی کھلی خلاف ورزی ہیں۔ تہران کے مطابق یہ حملے خطے اور عالمی امن کے لیے خطرہ ہیں۔

بیان کے مطابق، امریکی سینٹرل کمانڈ نے ایران کے فوجی اہداف پر حملے کیے ہیں، جس کا مقصد ایران کی تجارتی جہازوں کو نشانہ بنانے کی صلاحیت کمزور کرنا ہے۔

یاد رہے کہ امریکا اور ایران کے درمیان کشیدگی عالمی تجارت، توانائی منڈیوں، اور سفارتی کوششوں پر گہرے اثرات ڈال سکتی ہے۔