امریکی سینٹرل کمانڈ نے ایران کے خلاف حملوں کے تیسرے مرحلے میں 140 فوجی اہداف کو نشانہ بنایا ہے۔
واشنگٹن: (رائیٹ ناؤ نیوز) امریکی سینٹرل کمانڈ نے دعویٰ کیا ہے کہ اس نے ایران کے خلاف تین روز کے دوران حملوں کے تیسرے مرحلے میں تقریباً 140 ایرانی فوجی اہداف کو نشانہ بنایا ہے۔ یہ کارروائیاں آبنائے ہرمز میں تجارتی جہازوں پر ہونے والے حملوں کے ردعمل میں کی گئیں۔
سینٹکام نے بتایا ہے کہ ان حملوں میں زمینی اور بحری اڈوں سے پرواز کرنے والے جنگی طیاروں، ڈرونز اور امریکی بحری جہازوں سے جدید ہتھیار استعمال ہوئے۔ ان حملوں میں ایران کے میزائل اور ڈرون تنصیبات کو نشانہ بنایا گیا۔
امریکی فوج کا کہنا ہے کہ تین راتوں پر مشتمل ان کارروائیوں میں 300 سے زائد اہداف کو نشانہ بنایا جا چکا ہے۔ ان حملوں کا مقصد ایران کی اس صلاحیت کو کمزور کرنا ہے جو آبنائے ہرمز میں تجارتی جہازوں کو خطرے میں ڈال سکتی ہے۔
واضح رہے کہ آبنائے ہرمز دنیا کی اہم ترین بحری گزرگاہوں میں شمار ہوتی ہے جہاں سے عالمی سطح پر تیل کی بڑی مقدار گزرتی ہے۔ اس علاقے میں بڑھتی ہوئی فوجی کشیدگی عالمی توانائی کی منڈیوں پر گہرے اثرات مرتب کر سکتی ہے۔
ایران کی جانب سے امریکی حملوں پر باضابطہ ردعمل کا انتظار ہے جبکہ خطے میں صورتحال بدستور کشیدہ ہے۔ عالمی برادری کشیدگی کم کرنے کے لیے سفارتی کوششوں پر زور دے رہی ہے۔
