ممبئی: (رائیٹ ناوٴ نیوز) ممبئی کے 72 سالہ بھرت ہرک چند شاہ نے الزام لگایا ہے کہ ایک بروکریج فرم نے ان کے اور ان کی اہلیہ کے اکاؤنٹ سے 35 کروڑ بھارتی روپے کا فراڈ کیا ہے۔ یہ فراڈ چار سال کے دوران ان کے اکاؤنٹ کو غیر مجاز تجارت کے لیے استعمال کر کے کیا گیا۔

بھرت شاہ نے 2020 میں ایک دوست کی مشاورت سے بروکریج فرم کے ساتھ ڈیمیٹ اور ٹریڈنگ اکاؤنٹ کھولا تھا، جہاں سے ان کے اکاؤنٹ سے فراڈ کا آغاز ہوا۔ انہوں نے اپنے وراثت میں ملنے والے شیئرز اکاؤنٹ میں منتقل کیے تھے۔

کمپنی کی جانب سے بھرت کو بتایا گیا تھا کہ ٹریڈنگ کے لیے اضافی سرمایہ کاری کی ضرورت نہیں ہوگی اور شیئرز کو بطور ضمانت استعمال کرتے ہوئے محفوظ تجارت کی جا سکے گی۔ تاہم، کمپنی کے دو ملازمین نے ان کے اکاؤنٹ پر مکمل کنٹرول حاصل کر لیا اور وسیع تجارتی سرگرمیاں چلائیں۔

مارچ 2020 اور جون 2024 کے دوران بھرت شاہ کو سالانہ منافع کی اسٹیٹمنٹ بھیجی جاتی رہی، جس کی بنا پر انہیں شک نہیں ہوا۔ جولائی 2024 میں کمپنی کے رسک مینجمنٹ ڈپارٹمنٹ کی کال نے معاملے کو عیاں کر دیا۔

بھرت شاہ کو بتایا گیا کہ ان کے اکاؤنٹ پر 35 کروڑ روپے کا ڈیبٹ بیلنس ہے اور اگر یہ ادا نہ کیا گیا تو ان کے شیئرز فروخت کر دیے جائیں گے۔ بھرت نے قانونی کارروائی کا آغاز کر دیا ہے۔