واشنگٹن: (رائیٹ ناؤ نیوز) ٹک ٹاک اور بائٹ ڈانس نے امریکا میں بچوں کی آن لائن رازداری سے متعلق مقدمے کا 40 کروڑ ڈالر میں تصفیہ کرلیا ہے۔ امریکی محکمۂ انصاف نے اگست 2024 میں ٹک ٹاک پر بچوں کی معلومات جمع کرنے کا الزام عائد کیا تھا۔

مقدمے میں کہا گیا تھا کہ ٹک ٹاک نے 13 سال سے کم عمر بچوں کی ذاتی معلومات والدین کی اجازت کے بغیر جمع اور استعمال کی۔ مزید یہ کہ قانونی تقاضے پورے نہ کرنے کا بھی الزام لگایا گیا تھا۔

ٹک ٹاک نے تصفیے کے تحت فوری طور پر 30 کروڑ ڈالر ادا کرنے پر اتفاق کیا ہے، جبکہ مزید 10 کروڑ ڈالر کی ادائیگی عدالت کے حکم سے مشروط ہے۔

یہ معاملہ اہمیت رکھتا ہے کیونکہ بچوں کی آن لائن پرائیویسی پروٹیکشن ایکٹ کے تحت والدین کی رضامندی ضروری ہے۔ اس قانون کی خلاف ورزی پر کمپنی کو 2019 میں بھی جرمانہ ہوا تھا۔

واضح رہے کہ 2019 میں ٹک ٹاک کے پیشرو پلیٹ فارم میوزکلی کے خلاف بچوں کی رازداری کے قانون کی خلاف ورزی پر 57 لاکھ ڈالر کا جرمانہ عائد کیا گیا تھا۔