کراچی: (رائیٹ ناوٴ نیوز) میئر کراچی مرتضیٰ وہاب نے کہا ہے کہ رواں سال ترقیاتی کاموں کی تکمیل کا سال ہے۔ شہر کے تمام ٹاؤنز میں نمایاں ترقیاتی سرگرمیاں جاری ہیں۔ کے ایم سی اس سال 68 ارب روپے ترقیاتی منصوبوں پر خرچ کرے گی اور 15 جون تک منصوبوں کی تکمیل کی کوشش کی جا رہی ہے۔

مرتضیٰ وہاب نے شہر کے مختلف علاقوں میں جاری ترقیاتی منصوبوں کا دورہ کیا۔ انہوں نے کہا کہ کراچی میں جاری کاموں پر کسی قسم کا سمجھوتہ نہیں کیا جائے گا۔ بہتر انفراسٹرکچر کی فراہمی ان کی ذمہ داری ہے۔

میئر کراچی نے اولڈ سٹی میں میسم لی اسٹریٹ کی بحالی کا معائنہ کیا۔ اس موقع پر صحافیوں اور بلدیہ عظمیٰ کے افسران بھی ان کے ہمراہ تھے۔ ان کا کہنا تھا کہ میڈیا کو ساتھ لانے کا مقصد ترقیاتی کاموں کی شفافیت کو عوام کے سامنے رکھنا ہے۔

میئر نے ضلع سینٹرل میں جاری میگا ترقیاتی اسکیموں کا بھی جائزہ لیا۔ ایس ایم توفیق روڈ پر بحالی کے کام کا معائنہ کیا۔ وہ شہر بھر میں جاری ترقیاتی کاموں کو جلد مکمل کرنے کے عزم کا اظہار کر رہے ہیں۔

واضح رہے کہ میئر کراچی نے بلاول بھٹو زرداری کا شکریہ ادا کیا ہے۔ ان کی ہدایات پر شہر میں ترقیاتی کاموں کی رفتار تیز کی گئی ہے۔ پیپلز پارٹی شہر کی ترقی کے لیے پرعزم ہے اور اپنے وعدے پورے کرنے کی کوشش کر رہی ہے۔