رمضان میں اکثر پکوڑے اندر سے کچے رہ جاتے ہیں، اس کی وجہ تیل کا غلط درجۂ حرارت ہوتا ہے۔ درست درجۂ حرارت اور بیٹر کی تیاری کے طریقے سے یہ مسئلہ حل ہو سکتا ہے۔
کراچی: (رائیٹ ناوٴ نیوز) رمضان کے مہینے میں افطاری کے دوران پکوڑے اور دیگر تلی ہوئی چیزیں عام طور پر گھروں میں تیار کی جاتی ہیں۔ لیکن اکثر اوقات یہ مسئلہ ہوتا ہے کہ پکوڑے باہر سے سنہری لیکن اندر سے کچے رہ جاتے ہیں۔ اس مسئلے سے بچنے کے لیے تیل کے درجۂ حرارت کو درست طریقے سے سمجھنا ضروری ہے۔
ماہرین کے مطابق پکوڑے اندر سے کچے رہنے کی سب سے بڑی وجہ تیل کا غلط درجۂ حرارت ہوتا ہے۔ اگر تیل بہت زیادہ گرم ہو تو پکوڑے باہر سے فوراً براؤن ہو جاتے ہیں، مگر اندرونی حصہ کچا رہ جاتا ہے۔
پکوڑوں کے بیٹر کو اچھی طرح پھینٹنا چاہیے تاکہ ہوا شامل ہو اور تلنے کے دوران گرمی اندر تک پہنچے۔ بیٹر بہت گاڑھا نہ ہو، بلکہ درمیانی گاڑھا پن ہونا چاہیے تاکہ پکوڑے اندر تک پک جائیں۔
تیل کا درجۂ حرارت چیک کرنے کے لیے کڑاہی میں تیل کو درمیانی آنچ پر گرم کریں اور ایک چھوٹا سا آمیزے کا قطرہ ڈال کر چیک کریں۔ اگر قطرہ فوراً اوپر آ جائے تو تیل بہت زیادہ گرم ہے۔ درست درجۂ حرارت وہ ہے جب قطرہ آہستہ آہستہ اوپر آئے۔
پکوڑوں کو ہمیشہ درمیانی آنچ پر تلیں تاکہ وہ اندر سے پک جائیں اور باہر سے خستہ ہوں۔
