لاہور: (رائیٹ ناوٴ نیوز)۔ وزیراعلیٰ پنجاب مریم نواز نے لاہور میں 50 ایکڑ پر مشتمل فلم سٹی کے قیام کا اعلان کیا ہے۔ یہ منصوبہ نواز شریف آئی ٹی سٹی میں مکمل اینڈ ٹو اینڈ میڈیا پروڈکشن حب کے طور پر تعمیر ہوگا۔

مریم نواز نے کہا ہے کہ جدید ٹیکنالوجی سے پاکستان کی فلمی صنعت کی بحالی کو یقینی بنایا جائے گا۔ یہاں فلم، ٹی وی، اور اینیمیشن کے لیے تمام جدید سہولیات فراہم کی جائیں گی۔

حکام کے مطابق، فلم سٹی میں عالمی معیار کے اسٹوڈیوز، ساؤنڈ اسٹیج اور پوسٹ پروڈکشن لیبز قائم ہوں گے۔ شوٹنگ سیٹس اور کنونشن ہال بھی تعمیر کیے جائیں گے۔

یہ منصوبہ ہزاروں افراد کو روزگار فراہم کرے گا اور ملک میں تخلیقی معیشت کو فروغ دے گا۔ اس کے ذریعے فلمی صنعت کو مزید ترقی ملے گی۔

یاد رہے کہ یہ پاکستان کا پہلا مکمل میڈیا پروڈکشن حب ہوگا، جو ملکی و بین الاقوامی سطح پر فلمی صنعت کو بڑھاوا دے گا۔