واشنگٹن: (رائیٹ ناوٴ نیوز) اسرائیل نے ایران پر حملے کا نیا منصوبہ بنا لیا ہے، امریکی میڈیا نے دعویٰ کیا ہے کہ اسرائیلی وزیر اعظم امریکی صدر کو ممکنہ حملوں پر بریفنگ دینے کا ارادہ رکھتے ہیں۔ یہ بات امریکی نشریاتی ادارے این بی سی نیوز نے ہفتے کے روز اپنی رپورٹ میں بتائی۔

رپورٹ کے مطابق اسرائیلی حکام کو تشویش ہے کہ ایران ان جوہری افزودگی مراکز کو دوبارہ فعال کرنے کی کوشش کر رہا ہے جنہیں جون میں امریکی حملوں میں نشانہ بنایا گیا تھا۔ اسی تناظر میں اسرائیل امریکی صدر کو میزائل پروگرام پر دوبارہ حملے کے ممکنہ آپشنز سے بھی آگاہ کرنے کی تیاری کر رہا ہے۔

این بی سی نیوز کے مطابق اسرائیلی حکام کا خیال ہے کہ اگرچہ ایران کی جوہری تنصیبات کی بحالی ایک تشویش ہے، تاہم بیلسٹک میزائل کی تیاری سے جڑی تنصیبات کی ازسرِ نو تعمیر اور فضائی دفاعی نظام کی مرمت زیادہ فوری خطرہ بن سکتی ہے۔

ذرائع کے مطابق صدر ٹرمپ اور وزیر اعظم نیتن یاہو کی ملاقات اس ماہ کے آخر میں فلوریڈا میں ٹرمپ کی رہائش گاہ مارا لاگو میں متوقع ہے۔ ملاقات میں نیتن یاہو ایران کے بیلسٹک میزائل پروگرام کو اسرائیل، خطے کے استحکام اور امریکی مفادات کے لیے خطرہ قرار دیتے ہوئے ممکنہ فوری اقدامات پر زور دیں گے۔

واضح رہے کہ صدر ٹرمپ نے گزشتہ ہفتے صحافیوں سے گفتگو میں کہا تھا کہ ملاقات کو باضابطہ طور پر طے نہیں کیا گیا، تاہم اسرائیلی حکام کے مطابق یہ ملاقات ۲۹ دسمبر کو شیڈول ہے۔

اسرائیلی وزیراعظم نے بیان دیا ہے کہ ایران کے بیلسٹک میزائل پروگرام میں توسیع ایک خطرہ ہے اور اس کے جواب میں فوری کارروائی کی ضرورت ہو سکتی ہے۔