لندن: (رائیٹ ناؤنیوز) برطانوی وزیر خارجہ ایڈ ملی بینڈ نے ایرانی ہم منصب عباس عراقچی کو یقین دہانی کرائی ہے کہ برطانیہ ایران کے خلاف جنگ کا حصہ نہیں بنے گا۔ دونوں رہنماؤں کے درمیان مشرق وسطیٰ کی صورتحال پر بھی بات چیت ہوئی۔

ایرانی وزارت خارجہ کے بیان کے مطابق عباس عراقچی نے برطانوی وزیر سے ٹیلیفون پر بات کرتے ہوئے کہا ہے کہ ایران کے خلاف امریکی جارحیت میں تعاون ناقابل قبول ہے۔ انہوں نے برطانیہ کو اپنی پالیسیوں پر نظرثانی کرنے کی تجویز دی۔

عباس عراقچی نے واضح کیا کہ کسی ملک کی سرزمین کو غیر قانونی حملے کے لیے استعمال کرنا بین الاقوامی قانون کی خلاف ورزی ہے۔ انہوں نے کہا کہ ایران اپنے دفاع کا حق محفوظ رکھتا ہے۔

برطانوی وزیر خارجہ نے دوطرفہ تعلقات بہتر بنانے کے لیے سفارتی روابط کی اہمیت پر زور دیا۔ انہوں نے کہا کہ برطانیہ مسائل کے حل کے لیے سفارت کاری پر یقین رکھتا ہے۔

واضح رہے کہ برطانوی وزیراعظم نے ایران پر حملوں کے لیے امریکی افواج کو فوجی اڈے استعمال کرنے کی اجازت دی ہے۔ برطانیہ نے پاسداران انقلاب کو خطرہ قرار دیا ہے اور معاونت کرنے والوں کے لیے سخت سزائیں مقرر کی ہیں۔