تہران: (رائیٹ ناؤ نیوز) ایران کی مسلح افواج نے دھمکی دیتے ہوئے کہا ہے کہ امریکا کو ایران پر حملہ کرنے میں سہولت فراہم کرنے والا ہر ملک اور فوجی اڈہ ایرانی افواج کا جائز ہدف تصور ہوگا۔ ایران کا کہنا ہے کہ خودمختاری کی خلاف ورزی میں امریکی مدد ناقابل قبول ہے اور ایسے مقامات کو نشانہ بنایا جا سکتا ہے۔

ایران اور امریکا کے درمیان حالیہ فوجی کارروائیوں کے بعد کشیدگی میں اضافہ ہوا ہے۔ ایران نے واشنگٹن پر جنگ بندی کی خلاف ورزی کا الزام عائد کیا ہے جبکہ امریکا نے ایران پر معاہدے کی خلاف ورزی کا دعویٰ کیا ہے۔

ایران کے تازہ بیان کو خطے میں امریکی فوجی اڈوں کے لیے اہم پیغام سمجھا جا رہا ہے۔ ابھی تک واضح نہیں کیا گیا کہ کن ممالک یا مقامات کو اس تناظر میں شامل کیا گیا ہے۔

علاقائی تجزیہ کاروں کے مطابق کشیدگی برقرار رہی تو مشرق وسطیٰ میں سکیورٹی صورتحال مزید پیچیدہ ہو سکتی ہے، اور سفارتی کوششوں کو دھچکا پہنچ سکتا ہے۔

واضح رہے کہ تسنیم نیوز کے مطابق، بندر ماہشہر میں امریکی ڈرونز کے ساتھ جھڑپ کے دوران پاسدارانِ انقلاب کا ایک اہلکار جاں بحق ہوگیا۔ مزید تفصیلات جاری نہیں کی گئیں۔