واشنگٹن: (رائیٹ ناؤ نیوز) امریکی صدر ڈونلڈ ٹرمپ نے خبردار کیا ہے کہ اگر ایران کے ساتھ جاری مذاکرات ناکام ہوئے تو آبنائے ہرمز پر ٹول (فیس) عائد کرنے پر غور کیا جائے گا۔ انہوں نے کہا کہ موجودہ صورتحال میں کوئی ٹول نافذ نہیں ہو گا مگر معاہدہ ناکام ہونے پر خدمات کے عوض فیس وصول کی جائے گی۔

صدر ٹرمپ نے اپنے سوشل میڈیا پلیٹ فارم پر کہا ہے کہ امریکا مشرق وسطیٰ کے ممالک کے لیے محافظ کا کردار ادا کر رہا ہے اور اس کے لیے بھاری اخراجات برداشت کر رہا ہے۔ انہوں نے مزید کہا کہ ماضی، حال اور مستقبل کے اخراجات کے ازالے کے لیے محصولات یا ٹول عائد کرنے کا حق محفوظ ہے۔

آبنائے ہرمز دنیا کی اہم ترین سمندری گزرگاہوں میں شامل ہے جہاں سے عالمی تیل تجارت کا بڑا حصہ گزرتا ہے۔ اس کی اہمیت عالمی توانائی کی منڈیوں کے لیے انتہائی زیادہ ہے اور اس کے ذریعے خلیج فارس کو بحیرہ عرب سے ملایا جاتا ہے۔

معاشی ماہرین کے مطابق اگر مستقبل میں ٹول عائد کیا گیا تو اس کے عالمی تیل کی قیمتوں اور بحری تجارت پر نمایاں اثرات مرتب ہوں گے۔ یہ اقدام بین الاقوامی معیشت پر بھی اثر ڈال سکتا ہے۔

واضح رہے کہ امریکا اور ایران کے درمیان حالیہ مفاہمتی معاہدے پر مذاکرات جاری ہیں۔ ٹرمپ کا بیان ان مذاکرات پر دباؤ بڑھانے کی کوشش ہو سکتا ہے تاکہ دونوں فریق جلد کسی حتمی سمجھوتے تک پہنچ سکیں۔