اسلام آباد: (رائیٹ ناؤ نیوز) نائب وزیر اعظم و وزیر خارجہ اسحاق ڈار نے خبردار کیا ہے کہ پاکستان کا پانی روکنے کی کسی بھی بھارتی کوشش کو جنگ تصور کیا جائے گا۔ انہوں نے سفارتی کور سے خطاب میں کہا کہ سندھ طاس معاہدے سے متعلق بھارتی اقدامات خطے کے امن کے لیے خطرہ بن سکتے ہیں۔

نائب وزیر اعظم نے کہا کہ پاکستان اپنے آبی حقوق کے تحفظ کے لیے ہر ممکن اقدام کرے گا۔ انہوں نے پہلگام حملے کا الزام بغیر ثبوت پاکستان پر عائد کرنے اور اس کے بعد بھارتی جارحیت کا ذکر کیا۔ پاکستانی افواج نے مؤثر جواب دیا اور کسی بھی مس ایڈونچر کا بھرپور جواب دینے کی صلاحیت رکھی۔

اسحاق ڈار نے کہا کہ مسئلہ کشمیر کے حل کے بغیر خطے میں پائیدار امن ممکن نہیں۔ پاکستان خطے میں امن اور استحکام کا خواہاں ہے۔ انہوں نے دریائے چناب کے بہاؤ میں کمی پر تشویش کا اظہار کیا اور بھارت سے شفاف ڈیٹا فراہم کرنے کا مطالبہ کیا۔

انہوں نے ایران اور خلیجی ممالک پر ہونے والے حملوں کی مذمت کی اور خطے میں کشیدگی کم کرنے کے لیے پاکستان کے کردار کو اجاگر کیا۔ ان کے مطابق پاکستان کی کوششوں سے امریکا اور ایران کے درمیان مذاکرات ممکن ہوئے۔

یاد رہے کہ پاکستان نے ہمیشہ خطے میں امن، استحکام اور سفارتی حل کے فروغ کے لیے کوششیں جاری رکھی ہیں اور نائب وزیر اعظم نے اس عزم کا اعادہ کیا کہ یہ کوششیں جاری رہیں گی۔