اسلام آباد: (رائیٹ ناوٴ نیوز) ملک میں رجسٹرڈ کمپنیوں کی تعداد 2 لاکھ 90 ہزار سے تجاوز کرگئی ہے۔ سیکیورٹیز اینڈ ایکسچینج کمیشن آف پاکستان (ایس ای سی پی) کے مطابق صرف مارچ 2026 میں 2993 نئی کمپنیاں رجسٹر ہوئیں، جن میں 58 کمپنیوں میں چین، برطانیہ، جرمنی اور امریکا کے سرمایہ کار شامل ہیں۔

ایس ای سی پی کے جاری کردہ اعلامیہ کے مطابق، گزشتہ سال کے مقابلے مارچ میں نئی کمپنیوں کی رجسٹریشن میں 11 فیصد اضافہ ہوا ہے۔ ان کمپنیوں کا ادا شدہ سرمایہ 2 ارب 80 کروڑ روپے ہے۔ 57 فیصد پرائیویٹ لمیٹڈ کمپنیاں اور 49 فیصد سنگل ممبر کمپنیاں رجسٹر کی گئیں۔

آئی ٹی اور ای کامرس کے شعبے میں سب سے زیادہ 606 نئی کمپنیاں رجسٹر ہوئیں۔ پنجاب میں 1488، اسلام آباد میں 552، اور سندھ میں 447 نئی کمپنیاں رجسٹر ہوئیں۔

گلگت بلتستان میں 233، خیبرپختونخوا میں 224، اور بلوچستان میں 49 کمپنیاں رجسٹر ہوئیں۔ یہ رجسٹریشن کا عمل ملک کے مختلف حصوں میں کاروباری مواقع کو فروغ دینے میں مددگار ثابت ہوا۔

واضح رہے کہ پاکستان میں کمپنیوں کی رجسٹریشن میں مسلسل اضافہ ہو رہا ہے، جو ملک کی معیشت کی ترقی کو ظاہر کرتا ہے۔