کراچی: (رائیٹ ناوٴ نیوز) پاکستان کی کرنسی مارکیٹ میں ایرانی ریال کی مانگ میں غیر معمولی اضافہ دیکھنے میں آ رہا ہے۔ ڈالر سمیت دیگر کرنسیوں کے بجائے شہری ایرانی ریال میں سرمایہ کاری کر رہے ہیں۔

اعداد و شمار کے مطابق جنگ سے پہلے ایک کروڑ ایرانی ریال محض 2500 پاکستانی روپے میں ملتے تھے، لیکن اب وہی ریال 10 ہزار روپے تک پہنچ چکے ہیں۔ ریال کی قیمت میں چار گنا اضافہ ہوا ہے۔

حکام کے مطابق سرمایہ کار ایرانی کرنسی کی قدر میں اضافے کی توقع کر رہے ہیں۔ ایکسچینج کمپنیز ایسوسی ایشن کے چیئرمین ملک بوستان نے بتایا کہ مارکیٹ میں دو طرح کے خریدار موجود ہیں، تاجر اور پرجوش سرمایہ کار۔

ایران کے ساتھ تجارت میں غیر معمولی اضافہ بھی اس رجحان کی بڑی وجہ ہے۔ ماہرین کا کہنا ہے کہ مستقبل میں ایرانی ریال کی قیمت میں مزید اضافہ ہو سکتا ہے، اس لیے یہ سرمایہ کاری اہم ہو سکتی ہے۔

واضح رہے کہ ایران اپنی تیل کی فروخت میں 30 فیصد تک اضافہ کرچکا ہے، جس نے سرمایہ کاروں کو مزید پر اعتماد کیا ہے۔ اس کے باوجود، ماہرین خبردار کر رہے ہیں کہ غیر مستحکم حالات میں سرمایہ کاری میں احتیاط برتنی چاہیے۔