نئی دہلی: (رائیٹ ناوٴ نیوز) بھارتی کرکٹ بورڈ نے انڈین پریمیئر لیگ (آئی پی ایل) کے دوران کھلاڑیوں کی گراؤنڈ میں نقل و حرکت پر نئے قوانین متعارف کروائے ہیں۔ ان قوانین کے تحت بینچ پر موجود کھلاڑیوں کی گراؤنڈ میں داخلے پر سخت پابندیاں عائد کی گئی ہیں۔

نئے قوانین کے مطابق اضافی کھلاڑیوں کو میدان میں داخلے کی اجازت نہیں ہوگی، جب تک کہ وہ 16 رکنی ٹیم شیٹ میں شامل نہ ہوں۔ فرنچائزز کو ہدایت دی گئی ہے کہ 16 رکنی اسکواڈ میں شامل نہ ہونے والے متبادل کھلاڑی میدان میں ڈرنکس، بیٹس یا پیغامات لے کر داخل نہیں ہو سکیں گے۔

فرنچائزز کو حالیہ ہدایات موصول ہوئی ہیں کہ سبسٹیٹیوٹ کھلاڑی میچ کے دوران گراؤنڈ میں آزادانہ نقل و حرکت نہیں کر سکیں گے۔ ان کھلاڑیوں کو ڈرنکس لے جانے کی بھی اجازت نہیں ہوگی، سوائے ان 16 کھلاڑیوں کے جو میچ کے لیے نامزد کیے گئے ہیں۔

یہ ہدایات شقوں 11.5.2 اور 24.1.4 میں اضافے کے طور پر سامنے آئی ہیں۔ شق 11.5.2 کے مطابق ڈرنکس باؤنڈری لائن پر یا وکٹ گرنے کے وقفے کے دوران دی جا سکتی ہیں، بشرطیکہ وقت ضائع نہ ہو۔

واضح رہے کہ شق 24.1.4 کے تحت وہ کھلاڑی جو میچ کا حصہ نہیں ہیں، انہیں گراؤنڈ اور باؤنڈری لائن کے اطراف ٹیم کی ٹریننگ بِب پہننا لازمی ہوگا۔ یہ قوانین کھلاڑیوں کی نقل و حرکت کو مزید منظم کرنے کے لیے بنائے گئے ہیں۔